Nga e nderuara znj.Elvira Zeneli

Elvira Zeneli

PEIZAZHI IM EPIK

Gurra çau malin, u bë krua,
ujët rrodhi gur më gur,
era lidhi fjalët, ulli me ullin,
qumështi pikoi nga gjiri në buzë,
e gjakun s’e lau dot kurrë asnjë shi.
Vitet ikën, radhë pas radhe,
koha u thinj në ballë,
po jo kënga e krojeve,
as jehona e maleve tona epike.

Mbani shënim:
edhe pas qindra vitesh
po kaq i freskët do të rrjedhë ky ujë i krojeve,
dhe kënga shqipe, përsëri,
do të ngjallë jehonë nëpër male.