Poezi nga Dritero Agolli

Të vërteta të fshehura

Kur era takohet me natën,
Zbret ujku nga mali për gjah ;
Ti mbylle me rreze kanatën
Dhe shtrihu me kokën në krah .

Unë ujkut te vatha e dhenve,
Një grackë dinake i ngreh;
Ti zgjohu nga lajmet e qenve
Dhe pyey për mua:” Ku je?”

Në çast më kujto të gjakosur
Nga dhëmbët e ujkut të zi
Dhe ndofta ashtu sakatosur
Te porta më prit kur të vij…

Kjo vjershë i fsheh të vërtetat,
Nga ujku yt shoq s’u përgjak!
Atë e gjakosën gazetat
Me ujqit e tyre përqark.

Kur era takohet me natën,
Nga mali zbret ujku për gjah…
Kështu do ta mbyllja baladën,
Po ujk i gazetës s’më la.

1993 Dritero Agolli

Leave a Reply

Your email address will not be published. Required fields are marked *