Kryeministri Albin Kurti kujton me nderim Triumf Rizen

Bashkë me prindërit dhe familjarë të Heroit të Kosovës, zyrtarit policor Triumf Riza, me ministrin e Punëve të Brendshme, Xhelal Sveçla, drejtorin e Policisë, Gazmend Hoxha dhe me eprorët e lartë të Policisë së Kosovës, bëmë nderime për oficerin e jashtëzakonshëm policor, Triumf Riza, i cili para 18 viteve në vendparkimin e lagjes Dardania në kryeqytet, u vra mizorisht nga pusia me një breshëri plumbash.

Triumf Riza, para se të jetë polic i guximshëm, ishte njeri i guximshëm. Menjëherë në vitin 1999, kur ishte vetëm 20-vjeçar, u inkuadrua në Policinë e Kosovës, atëherë Shërbimi Policor i Kosovës, për t’i shërbyer rendit publik dhe sundimit të ligjit. Ishte i përkushtuar dhe i pakompromis.

Unë kam banuar për afër nëntë vjet në këtë lagje dhe e kam njohur personalisht Triumf Rizën. Ka qenë djalë fenomenal i kryeqytetit, i cili e ka dashur drejtësinë dhe nuk e ka kursyer veten në asnjë çast për drejtësinë. Të gjithë qytetarët që e kanë njohur, të gjithë shokët dhe shoqet që i ka pasur, kanë veçse fjalët më të mira për të, sepse edhe në të gjallë ka qenë shembull për të gjithë.

E tash, si Hero i Kosovës, si dikush që sakrifikoi jetën kundër bandave e grupeve kriminale, kundër njerëzve të cilët synojnë të jenë mbi shtetin e kundër qytetarit, është bërë inspirim për secilin zyrtar shteti e jo vetëm për Policinë e Kosovës.

Sot në lagjen Dardania, në 18-vjetorin e rënies së tij, ne vumë gurthemelin e lapidarit që i kushtohet atij, e që do të na e kujtojë përjetë e mot neve dhe brezave që do të vijnë, se t’i shërbesh Republikës së Kosovës është nder dhe përgjegjësi, dhe për këtë i kemi modelet të cilët duhet t’i ndjekim të gjithë bashkë dhe secili prej nesh.

Lavdi Triumf Rizës dhe të gjithë policëve të Republikës së Kosovës të rënë në krye të detyrës!